Taekvondo yığmamız İrana yola düşür

Taekvondo üzrə böyüklərdən ibarət milli komanda İrana yollanır.

Versus.Az xəbər verir ki, paytaxt Tehranda 6-9 mart tarixlərində keçiriləcək “Fəcr Açıq”, ardından isə 10-13 mart tarixlərində Asiya regionu üzrə “Prezident Kuboku” G2 kateqoriyalı beynəlxalq turnirində iştirak edəcək millinin heyətində 22 (14 kişi və 8 qadın) taekvondoçu yer alıb.

Azərbaycan Taekvondo Federasiyasının vitse-prezidenti Niyaməddin Paşayevin, kişilərdən ibarət milli komandanın baş məşqçisi Reza Mehmandust və böyük məşqçi Sənan Həşimov, qadınlardan ibarət milli komandanın baş məşqçisi Səbuhi Zülfüqarov və böyük məşqçi Rəşad Məmmədovun rəhbərliyi ilə yarışda iştirak edəcək komandamızın heyəti artıq bəllidir.

Belə ki, kişi taekvondoçulardan Səyyad Dadaşov, Rahid Vəliyev (hər ikisi -54 kq), Pərviz İsgəndərov (-58 kq), Xanoğlan Kərimov, Samir Məhərrəmov, Həşim Məhəmmədov (hər üçü -63 kq), Yaşar Məmmədli, Cavad Ağayev (hər ikisi -68 kq), Ayxan Tağızadə, Məhəmməd Məmmədov, Eltac Qafarov (hər üçü -74 kq), Səid Quliyev (-80 kq), Taleh Süleymanov (-87 kq), Radik İsayev (+87 kq) mübarizə aparacaq.

Qadınlardan isə Minayə Əkbərova, Sona Ağayeva (hər ikisi -46 kq), Röya Hacıyeva (-49 kq), Patimat Abakarova, Səidə Əliyeva (hər ikisi -53 kq), Fatimə Məcidova (-57 kq), Nuranə İbrahimova (-62 kq), Fəridə Əzizova (-67 kq) dayanq üzərinə çıxacaq.

Heyətdə əslən İrandan olan olimpiya mükafatçısı, ikiqat dünya və Avropa çempionu Milad Beiqi yer almayıb. Məsələ ilə bağlı Niyaməddin Paşayevin fikirlərini öyrənmək istəsək də, o, hava limanında çıxan problemlə bağlı bu məsələyə münasibət bildirmək istəmədiyini bildirib.