Təbrizdə fəaliyyət göstərən dastan söyləyiciləri Bakıya dəvət ediləcək

Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Folklorçular” İctimai Birliyi 2022-ci ilin fevral ayından etibarən “Milli mənəviyyatımızın işığı olan "Dastan gecələri"nin bərpası və təbliği” adlı layihənin icrasına başlayıb.

Geniş həcmi ilə seçilən dastanlar qurluş etibarı ilə Avropa romanlarını xatırladır. Orada qəhrəmanın həyat hekayəsi özünə geniş yer tapır. Dövrün hadisələri burada mifoloji təsəvvürlərlə çulğlaşmış şəklidə təzahür etdiyi üçün dastanlar həm də millətin sözlü tarixidir, onun keçmişinin, tarixinin öyrənilməsində əvəzsiz rol oynayır.

Qeyd etdiyimiz kimi təşkilat əvvəllər də Azərbaycanda dastançılıq ənənəsinin qorunub saxlanması və inkişafı üçün bir sıra tədbirlər həyata keçirib. Növbəti addım kimi bu günlərdə Bakı şəhərində Borçalı aşıqlarının ifasında 3 günlük “Dastan gecələri”nin keçirilməsi reallaşdırıldı. “Dastan gecələri”ndə Gürcüstan “El” aşıqları təşkilatının sədri Nargilə Mehtiyeva, təşkilatın üzvləri Aşıq Əşrəf Qəriboğlu (Təmirov), Aşıq Qara Süleymanov, Aşıq Samir Qaraxanov, Aşıq Qabil Abduyev, Aşıq Dərya Məlikzadə iştirak etdilər.

Tədbirə AMEA-nın müxtəlif İnstitutlarından elm adamları, Aşıqlar Birliyindən, müxtəlif ali məktəblərin tələbələri, aşıq yaradıcılığını sevən Bakı sakinləri qatılıblar. 3 gün ərzində aşıqların ifasında tamaşaçılıar müxtəlif dastanlardan hissələri dinlədilər.

Təşkilat gələcəkdə Təbrizdə fəaliyyət göstərən dastan söyləyicilərini Bakıya dəvət edərək, burada “Dastan gecələri” keçirməyi planlaşdırır.

Tədbirin sonunda aşıqlara sertifikat və hədiyyələr verildi.

Versus.Az