"Əfsələddin bəyin əlillik dərəcəsini də qanunvericilik əsasında həll edəcəyik"
Deputat Razi Nurullayev mayın 16-da Zığda yerləşən 6 saylı xüsusiləşdirilmiş vərəm xəstəxanasında İmişli rayonu, Cəfərli kənd sakini, müharibə iştirakçısı Əfsələddin Ağabəylini ziyarət edib.
Versus.Az xəbər verir ki, bu barədə deputatın özü məlumat verib.
Vərəm xəstəliyindən əziyyət çəkən Əfsələddin Ağabəylinin vəziyyətini xəstəxananın rəhbərliyi ilə müzakirə edən deputat Razi Nurullayev qazimizin artıq təhlükədən uzaq olduğunu vurğulayıb:
"İnşallah Əfsələddin bəy ayağa qalxıb normal həyatına dönəcək. O, bu xəstəxanada olduğu müddətdə demək olar ki, xeyli yaxşılaşıb və artıq nəfəs darlığı da keçir. Xəstəxanada vacib bir informasiyanı da öyrəndim və artıq əminəm ki, inşallah Əfsələddin bəyin əlillik dərəcəsini də qanunvericilik əsasında həll edə biləcəyik".
Razi Nurullayev köməkçisi Ehtiram Mehdiyevlə birlikdə Baş həkimin müşaiyyəti ilə xəstəxana ilə də tanış olub.
Versus.Az olaraq qazimiz Əfsələddin Ağabəyli ilə telefon əlaqəsi yaradaraq hazırki vəziyyəti ilə maraqlandıq. O, deputat Razi Nurullayevə minnətdarlığını ifadə edərək, bu diqqəti yüksək dəyərləndirdi. Eyni zamanda xəstəxananın baş həkiminə və həkim kollektivinə təşəkkürlərini çatdırdı.
Qazimizə Allahdan şəfa diləyirik. Allah bütün qazilərimizə cansağlığı versin.
SEVDA
Versus.Az
653 |
Cəmiyyət
