“Rusiyanın casus balinası”ndan uzaq durun”

Norveç Balıqçılıq İdarəsi vətəndaşlardan haqqında 2019-cu ildən bəri məlum olan “Rusiyanın casus balinası”ndan ehtiyatlı olmağı xahiş edib.

2019-cu ilin yazında norveçli balıqçılar kamera quraşdırılması üçün yerləri olan xüsusi hazırlanmış kəmər taxılmış ağ (beluqa) balina görüblər. Kəmərin üzərində isə Sankt-Peterburqdan olan bir şirkətin loqosu olub. Daha sonra yerli mediada xəbərlər dərc olunub ki,  “Xvaldimir” ləqəbli balina Rusiyadan üzüb gəlib.

“Oslo fyordunda beluqa balinaları ilə təmasdan çəkinin. “Xvaldimir” kimi tanınan balina hazırda Oslo fyordunun daxili hissəsində yaşayır”, - deyə idarədən verilən məlumatda qeyd edilib.

İdarənin rəhbəri Franka Bakke-Yensena öz növbəsində qayıqlardan istifadə edən şəxslərdən son dərəcə diqqətli olmalarını xahiş edib ki, balina onlarla təmas nəticəsində xəsarət almasın və ya ölməsin.