Əfsanəvi çempionun ustad dərsi keçirilib

Crocus Fitness Sabah’da Yunan-Roma güləşi üzrə əfsanəvi çempion Rafiq Hüseynovun ustad dərsi keçirilib.

Versus.Az xəbər verir ki, görüşün xüsusi qonağı qadın güləşinin canlı əfsanəsi, idman tarixində dörd Olimpiya Oyunlarında medal qazanan üç qadından biri Mariya Stadnik olub.

Ənənəyə uyğun olaraq, sual-cavab ilə başlayan görüşdə Rafiq Hüseynov qazandığı uğurlardan, qələbələrdən, idmanda nizam-intizamın vacibliyindən danışıb. Çempion, aralarında çoxlu gənc güləşçilərin də olduğu ustad dərsinin iştirakçılarına dəyərli məsləhətlər verərək, düzgün inkişafın istiqamətlərini izah edib.

Rafiq Hüseynov etiraf edib ki, onun həyatda əsas motivasiyası atası, Azərbaycanın əməkdar məşqçisi, polis polkovniki Radik Hüseynovdur. Çünki məhz onun nəzarəti altında adını dünya idman tarixinə yazmağı bacarıb:

"1995-ci ildən onunla, sözün əsl mənasında, zalı tərk etmirik. Atam bütün həyatını mənə həsr edib. Onun iradəsi və peşəkarlığı qarşısında baş əyirəm".

İkiqat dünya çempionu, üçqat Avropa çempionu, dünya kubokunun qalibi Rafiq Hüseynov, intellektual və şəxsi inkişafın vacibliyinə toxunaraq, gənc həmkarlarına xarici dilləri əzmlə öyrənməyi, məktəbdə yaxşı oxumağı, vətənlərinin tarixi ilə maraqlanmağı tövsiyə edib:

"Gələcəkdə bəziləriniz beynəlxalq arenada vətəninizin bayrağını qaldıracaqsınız. Belə hallarda sadəcə yaxşı idmançı olmaq kifayət deyil. Ona görə də təkcə idman zalında yox, həmçinin təhsildə də özünü inkişaf etdirmək çox vacibdir”.

Hüseynov, rəqibləri ilə güləşərkən ən çox istifadə etdiyi fəndlərdən birinin “tərs atış” olduğunu qeyd edib.
Çempion, ustad dərsinin praktiki məşğələsi zamanı dəqiq və peşakarcasına icra edilərək ona tatamidə dəfələrlə qələbə qazandıran bu fəndi nümayiş etdirdi.

Sonda Rafiq Hüseynov “Crocus Fitness Glory Museum” təqdim etdiyi güləş ayaqqabılarını imzaladı, tədbirin bütün iştirakçılarına avtoqraf verərək, hamı ilə xatirə şəkli çəkdirdi.

Çempion ən yaxşı suala görə mükafatı məşhur bakılı multiatletçisi Artyom Əliyevə verdi.

Ayəndə Dadaşova
versus.az