Məhəmməd Əsədullazadə: “Qərb ölkələri belə bir güc mərkəzinin inkişafında maraqlı deyil”

“Məhz Türkiyə Azərbaycan vasitəsi ilə Cənubi Qafqaz, Mərkəzi Asiya, Xəzər hövzəsi yeni qlobal dünyanın üzvü olur”.

Versus.Az xəbər verir ki, bunu Azərbaycan və Türkiyənin strateji müttəfiqliyi, güclü iqtisadi, mədəni əlaqələrə malik olmasının Qərb, Avropa və digər qüvvələr tərəfindən hansı reaksiya ilə qarşılanması ilə bağlı açıqlamasında politoloq Məhəmməd Əsədullazadə bildirib.

Türkiyə ilə Azərbaycan arasında strateji əməkdaşlığın Şuşa Bəyannaməsi ilə rəsmiləşdirildiyini bildirən ekspert, məhz iki ölkənin II Qarabağ müharibəsindən sonra Cənubi Qafqazda yeni regional siyasi nizam qurduğunu önə çəkib:

“Bu iki dövlət özünün xarici siyasətini daha da yaxınlaşdırıb, beynəlxalq təşkilatlar və Qərblə birgə xətt üzrə işləyəcək. Prezident İlham Əliyev inaqurasiya mərasimində məhz əsas strateji siyasətin Azərbaycanın, Türkiyənin digər türk dövlətləri ilə birgə Türk Ailəsində olacağını vurğuladı. Bu, bir növ Qərbə, qonşu ölkələrə verilən bir mesaj, həm də Azərbaycanla Türkiyənin yeni bir nizam, ittifaq yaradıcısının göstəricisidir”.

M.Əsədullazadə bildirib ki, Prezidentin Türkiyəyə səfəri, burada verilən bəyanatlar, II Qarabağ savaşından sonra Türkiyənin regional siyasətini dəyişməsi artıq Azərbaycanla Türkiyənin mövqelərinin güclənməsinə gətirib çıxardır:

“Təbii ki, Fransa başda olmaqla müəyyən dövlətlər, eləcə də İran və Rusiya bu ittifaqı qəbul etmir. Bu gün Qərbdən Azərbaycana qarşı yönələn təzyiqlər məhz Türkiyə ilə Azərbaycan arasında birgə fəaliyyət, birgə koordinasiyanın nəticəsidir. Ona görə də Qərb ölkələri belə bir güc mərkəzinin formalaşmasında, inkişafında maraqlı deyil. Ona görə də Azərbaycana, Türkiyəyə qarşı müxtəlif istiqamətlərdə təzyiqlər etməyə çalışırlar. Biz Qərbin Azərbaycana qarşı müəyyən təzyiqlərini görürük. Amma bu onlar üçün müsbət nəticə verməyəcək. Çünki Qərb özü də regiondan asılıdır.

SEVDA