Bu illər ləğv edilib, tarixdən SİLİNDİ

Osmanlı dövründə hər 33 ilin tamamında bir ili “yaşanılmamış” sayıb, “Ləğv ili” adlandırırdılar.

Bu barədə Türkiyə mediasında maraqlı araşdırma dərc olunub.

Bildirilib ki, Osmanlıda Hicri təqvimindən istifadə edilirdi və hər ay 29-30 gün olurdu. Bu təqvimlə hesablanan 12 aydan ibarət il 354-355 gün idi.

Osmanlı İmperiyası 1677-ci ildən maliyyə işlərində Rumi təqviminə keçdi. Bu təqvimdə il 365 gün hesablanırdı. Nəticədə ildə iki təqvim arasında 11 gün fərq olurdu. Həmin 11 gün fərq səbəbindən 33-cü ildə ikiqat ödənişlər edilirdi. Yəni iki təqvim fərqinə görə 32 dəfə vergi yığılır, 33 dəfə maaş ödənilir. Bu isə Osmanlı xəzinəsində ciddi kəsirə səbəb olurdu.

O dövrün maliyyə naziri Atıf Mustafa Əfəndi problemi həll etmək üçün “Ləğv ili” məsələni gündəmə gətirdi. Qərara əsasən həmin il yaşanılmamış hesab edilirdi və nəticədə maaş ödənilmirdi. Lakin bu “tapıntı” özü ilə uğursuzluqları da gətirdi. Tarixçi Halil Sahillioğlu “Ləğv ilinin çöküşləri” əsərində 33-cü ilin böhranlara səbəb olduğuna diqqət çəkib. O bildirib ki, Osmanlı İmperiyasındakı üsyanların əksəriyyəti həmin dövrə təsadüf edib.

“Ləğv ili”nin Osmanlı dövlətinin getdikcə zəifləməsində rol oynadığı da deyilir.