“Mən, Bakı milyonçusu Tağıyevin qızıyam”

Martın 18-də Milli Azərbaycan Tarixi Muzeyində tarix elmləri doktoru Fərhad Cabbarovun tərtibçisi olduğu “Mən, Bakı milyonçusu Tağıyevin qızıyam...” adlı kitabın təqdimatı keçirilib.

Versus.Az xəbər verir ki, arxiv materialları əsasında tərtib olunmuş kitab Azərbaycanın tanınmış sahibkarı və xeyriyyəçisi Hacı Zeynalabdin Tağıyevin qızı Sara Sarayeva-Tağıyevanın atasının sovet dövründə qadağalara və təhriflərə məruz qalmış adının bərpası uğrunda mübarizəsindən bəhs edir.

Tədbiri giriş sözü ilə açan Milli Azərbaycan Tarixi Muzeyinin direktoru, akademik Nailə Vəlixanlı muzeyin H.Z.Tağıyev irsinin öyrənilməsi və populyarlaşdırılması istiqamətində gördüyü işlərdən bəhs etdi. O, yeni çapdan çıxmış kitabın H.Z.Tağıyevin və onun qızının xatirələrinin yaşadılması işində böyük töhfə olduğunu vurğuladı.

Kitabın müəllifi Fərhad Cabbarov öz çıxışında S.Sarayeva-Tağıyevanın həyatından, atasının layiqli adının bərpası yolunda üzləşdiyi çətinliklərdən danışdı. Onun sözlərinə görə H.Z.Tağıyevin ictimai və xeyriyyəçilik fəaliyyəti haqqında məlumatların toplanması və təbliği işində Sara xanımın müstəsna xidmətləri olmuşdur.

Tədbirdə çıxış edən tarixçi-alim Firdovsiyyə Əhmədova, ssenarist Müsəllim Həsənov, S.Sarayeva-Tağıyevanın nəticəsi Rixard Petrov kitabla bağlı fikirlərini bölüşdülər. Həmçinin, Sara xanımın Rusiyada yaşayan övladları Oleq və Lev Sarayevlər tədbirə videobağlantı ilə qoşularaq, kitabın müəllifinə öz minnətdarlıqlarını bildirdilər.

Ayəndə Dadaşova
versus.az