“Heydər Əliyevin 100 illiyi” yubiley medalı təqdim edildi

Azərbaycan Respublikası Prezidentinin Sərəncamına əsasən, 7 may 2024-cü il tarixində Milli Azərbaycan Tarixi Muzeyində bir qrup mədəniyyət və incəsənət xadimi Ümummilli Lider Heydər Əliyev irsinin tədqiqi və təbliği, azərbaycançılıq ideyasının həyata keçirilməsi, ölkənin sosial-iqtisadi, elmi-texniki və mədəni inkişafında, həmçinin dövlət idarəçiliyində və ictimai-siyasi sahədə xidmətlərinə görə “Heydər Əliyevin 100 illiyi (1923–2023)” yubiley medalı ilə təltif olunub.

Versus.Az xəbər verir ki, yubiley medalı Azərbaycan Respublikasının Mədəniyyət naziri Adil Kərimli tərəfindən təqdim edilib.

Təltif olunanlar arasında Azərbaycan Respublikasının xalq artistləri Rasim Balayev, Nurəddin Mehdixanlı, Hacı İsmayılov, Səfiqə Məmmədova, Niyaməddin Musayev, Alim Qasımov, Mənsum İbrahimov, Ramiz Quliyev, dirijorlar Rauf Abdullayev Yalçın Adıgözəlov və Teymur Göyçayev, bəstəkarlar Tofiq Bakixanov və Faiq Sucəddinov, Fidan və Xuraman Qasımova bacıları, yazıçılar Anar, Çingiz Abdullayev və Natiq Rasulzadıə, şair Nəriman Həsənzadə, rejissor Mehriban Ələkbərzadə, memar Elbəy Qasımzadə, Vagif Mustafayev, Səkinə ismayılova, Oqtay Mirqasımov, Elmira Axundova və digər tanınmış simalar var idi.

Ayəndə Dadaşova
versus.az